ਮੁੰਬਈ:28,ਜੁਲਾਈ(ਏਜੰਸੀਆਂ)-ਆਲਮੀ ਵਿੱਤੀ ਮੰਦੀ ਚ ਸੁਧਾਰ ਦੀ ਆਸ ਅਤੇ ਵਧ ਰਹੇ ਵਿੱਤੀ ਘਾਟੇ ਦੀ ਵੰਗਾਰ ਦੇ ਦਰਮਿਆਨ ਰਿਜ਼ਰਵ ਬੈਂਕ ਨੇ ਕੁੰਜੀਵਤ ਵਿਆਜ ਦਰਾਂ ਚ ਕੋਈ ਵੀ ਤਬਦੀਲੀ ਨਾ ਕਰਨ ਦਾ ਫ਼ੈਸਲਾ ਲਿਆ ਹੈ। ਆਪਣੀ ਮੁਦਰਾ ਨੀਤੀ ਦੀ ਤਿਮਾਹੀ ਸਮੀਖਿਆ ਚ ਕੇਂਦਰ ਸਰਕਾਰ ਨੇ ਰੈਪੋ ਤੇ ਰਿਵਰਸ ਰੈਪੋ ਦਰਾਂ ਨੂੰ ਪਹਿਲਾਂ ਦੀ ਦਰ ਤੇ ਰੱਖਿਆ ਹੈ। ਇਸ ਤੋਂ ਇਲਾਵਾ ਆਰ ਬੀ ਆਈ ਨੇ ਚਾਲੂ ਵਿੱਤੀ ਸਾਲ ਦੌਰਾਨ ਵਿਕਾਸ ਦਰ 6 ਫ਼ੀਸਦੀ ਰਹਿਣ ਦਾ ਅੰਦਾਜ਼ਾ ਵੀ ਲਗਾਇਆ ਹੈ। ਰਿਜ਼ਰਵ ਬੈਂਕ ਵੱਲੋਂ ਵਿਆਜ ਦਰਾਂ ਚ ਕੋਈ ਤਬਦੀਲੀ ਨਾ ਕਰਨ ਦਾ ਜਿੱਥੇ ਬੈਂਕਾਂ ਤੇ ਪ੍ਰਾਪਰਟੀ ਬਜ਼ਾਰ ਵਾਲਿਆਂ ਨੇ ਸਵਾਗਤ ਕੀਤਾ ਹੈ, ਉਥੇ ਵਿੱਤੀ ਘਾਟੇ ਦਾ ਕਾਇਮ ਰਹਿਣਾ ਦੇਸ਼ ਲਈ ਵੰਗਾਰ ਬਣਿਆ ਹੋਇਆ ਹੈ। ਤਿਮਾਹੀ ਸਮੀਖਿਆ ਮੁਤਾਬਕ ਅਨਾਜ ਸਟਾਕ ਚ ਵਾਧਾ, ਉਦਯੋਗਿਕ ਉਤਪਾਦਨ ਚ ਹਾਂ ਪੱਖੀ ਸੁਧਾਰ ਤੇ ਵਪਾਰੀਆਂ ਚ ਆਸਾਵਾਦੀ ਰੁਖ ਵੇਖਣ ਨੂੰ ਮਿਲਿਆ ਹੈ। ਇਸ ਦੇ ਨਾਲ ਹੀ ਕੁਝ ਨਾਂਹ ਪੱਖੀ ਸੰਕੇਤ ਵੀ ਸਾਹਮਣੇ ਆਏ ਹਨ।