ਨਵੀਂ  ਪੈਨਸ਼ਨ ਸਕੀਮ ਤਹਿਤ ਡਾਕਖ਼ਾਨਿਆਂ  'ਚ ਖਾਤੇ ਖੁੱਲਣੇ ਸ਼ੁਰੂ
ਨਵੀਂ  ਦਿੱਲੀ, 8 ਸਤੰਬਰ ਡਾਕ ਮਹਿਕਮੇ ਨੇ ਪੈਨਸ਼ਨ  ਫੰਡ ਤੇ ਵਿਕਾਸ ਅਥਾਰਟੀ ਨਾਲ ਸਹਿਮਤੀ ਹੋਣ ਮਗਰੋਂ ਨਵੀਂ ਪੈਨਸ਼ਨ ਸਕੀਮ ਦੇ ਖਾਤੇ ਡਾਕਖ਼ਾਨਿਆਂ ਵਿੱਚ ਖੋਲ੍ਹਣੇ ਸ਼ੁਰੂ ਕਰ ਦਿੱਤੇ  ਹਨ। ਹੁਣ ਤੱਕ 20 ਡਾਕ ਸਰਕਲਾਂ ਦੇ ਵੱਡੇ ਡਾਕਖ਼ਾਨਿਆਂ ਵਿੱਚ 5 ਹਜ਼ਾਰ 186 ਨਵੇਂ ਪੈਨਸ਼ਨ  ਖਾਤੇ ਖੋਲ੍ਹੇ ਗਏ ਹਨ। ਡਾਕ ਮਹਿਕਮੇ ਵੱਲੋਂ ਇਸ ਸਾਲ 30 ਜੂਨ ਤੱਕ ਮਹਾਤਮਾ ਗਾਂਧੀ ਨਰੇਗਾ ਸਕੀਮ ਤਹਿਤ 4 ਕਰੋੜ 48 ਲੱਖ ਖਾਤੇ ਖੋਲ੍ਹੇ ਗਏ ਸਨ।

  ਮਹਿਕਮੇਂ ਵੱਲੋਂ ਨਰੇਗਾ ਮਜ਼ਦੂਰੀ ਦੇ ਭੁਗਤਾਨ ਲਈ  ਹਰ ਮਹੀਨੇ ਅਜਿਹੇ ਦੋਈ 8 ਲੱਖ ਨਵੇਂ ਖਾਤੇ ਖੋਲ੍ਹੇ ਜਾਂਦੇ ਹਨ। ਚਾਲੂ ਮਾਲੀ ਸਾਲ  ਦੌਰਾਨ ਹੁਣ ਤੱਕ ਕੋਈ 95 ਹਜ਼ਾਰ ਡਾਕਖ਼ਾਨਿਆਂ  ਰਾਹੀਂ ਨਰੇਗਾ ਮਜ਼ਦੂਰੀ ਵਜੋਂ 3 ਹਜ਼ਾਰ 406 ਕਰੋੜ ਰੁਪਏ ਨਰੇਗਾ ਮਜ਼ਦੂਰਾਂ ਨੂੰ ਵੰਡੇ ਗਏ ਹਨ। ਮਹਿਕਮੇਂ ਵੱਲੋਂ ਯੂਟੀਆਈ ਆਦਿ ਨਾਲ ਮਿਲ ਕੇ ਉਜਵੱਲ ਭਵਿੱਖ ਤਹਿਤ ਵੀ ਖਾਤੇ ਖੋਲ੍ਹੇ ਜਾ ਰਹੇ ਹਨ। ਛੋਟੇ ਸ਼ਹਿਰਾਂ ਤੇ ਕਸਬਿਆਂ ਵਿੱਚ ਸਰਮਾਏਕਾਰ ਇਨ੍ਹਾਂ ਸਕੀਮਾਂ ਵਿੱਚ ਡਾਕਖ਼ਾਨਿਆਂ ਵਿੱਚ ਪੈਸੇ ਲਗਾ ਸਕਣਗੇ।

ਸੂਬਿਆਂ  ਦੇ ਖੇਡ ਮੰਤਰੀਆਂ  ਵੱਲੋਂ ਕੌਮੀ ਖੇਡ ਕਾਨੂੰਨ ਬਣਾਏ ਜਾਣ ਦੀ ਵਕਾਲਤ

  ਨਵੀਂ  ਦਿੱਲੀ, 8 ਸਤੰਬਰ  ਸੂਬਿਆਂ ਦੇ ਯੁਵਾ ਤੇ ਖੇਡ  ਮਾਮਲਿਆਂ ਦੇ ਮੰਤਰੀਆਂ ਦੀ ਤੀਜੀ ਕਾਨਫਰੰਸ  ਨਵੀਂ ਦਿੱਲੀ ਵਿੱਚ ਕੇਂਦਰੀ ਯੁਵਾ ਮਾਮਲਿਆਂ  ਤੇ ਖੇਡ ਮੰਤਰੀ ਡਾ. ਮਨੋਹਰ ਸਿੰਘ ਗਿੱਲ ਦੀ ਪ੍ਰਧਾਨਗੀ ਹੇਠ ਹੋਈ। ਡਾ. ਗਿੱਲ ਨੇ ਅਗਲੇ ਮਹੀਨੇ ਨਵੀਂ ਦਿੱਲੀ ਵਿੱਚ ਹੋਣ  ਵਾਲੀਆਂ ਰਾਸ਼ਟਰ ਮੰਡਲ ਖੇਡਾਂ ਤੇ ਉਸ ਮਗਰੋਂ ਹੋਣ ਵਾਲੀਆਂ ਏਸ਼ਿਆਈ ਖੇਡਾਂ ਵਿੱਚ ਤਮਗੇਂ ਜਿੱਤਣ ਵਾਲੇ ਖਿਡਾਰੀਆਂ ਨੂੰ ਦਿੱਤੇ ਜਾਣ ਵਾਲੇ ਨਕਦ ਇਨਾਮ ਦੁੱਗਣੇ ਕਰਨ ਦਾ ਐਲਾਨ ਕੀਤਾ। ਸੂਬਿਆਂ  ਦੇ ਖੇਡ ਮੰਤਰੀਆਂ ਨੇ ਦੇਸ਼ ਵਿੱਚ ਇੱਕ ਕੌਮੀ ਖੇਡ ਕਾਨੂੰਨ ਬਣਾਏ ਜਾਣ  ਅਤੇ ਖੇਡਾਂ ਸਬੰਧੀ ਝਗੜਿਆਂ ਦੇ ਨਿਪਟਾਰੇ  ਲਈ ਇੱਕ ਕੌਮੀ ਟ੍ਰਿਬਿਊਨਲ ਸਥਾਪਤ ਕੀਤੇ ਜਾਣ ਦੀ ਵਕਾਲਤ ਕੀਤੀ। ਉਨ੍ਹਾਂ ਕਿਹਾ ਕਿ ਕੌਮੀ ਖੇਡ ਸੰਗਠਨਾਂ ਦੇ ਕੰਮਕਾਰ ਨੂੰ ਸੁਚੱਜਾ ਬਣਾਉਣ ਅਤੇ ਉਨਾਂ੍ਹ ਦੀ ਚੋਣ ਪ੍ਰਣਾਲੀ ਵਿੱਚ ਪੇਸ਼ੇਵਰ ਸਖਸ਼ੀਅਤਾਂ ਨੂੰ ਸ਼ਾਮਿਲ ਕੀਤੇ ਜਾਣ ਦੀ ਲੋੜ ਹੈ। ਉਨ੍ਹਾਂ ਕਿਹਾ ਕਿ ਅਨੇਕਾਂ ਬਾਹਰਲੇ ਮੁਲਕਾਂ ਵਿੱਚ ਅਜਿਹੇ ਕਾਨੂੰਨ ਤੇ ਟ੍ਰਿਬਿਊਨਲ ਬਣੇ ਹੋਏ ਹਨ ਜਿੱਥੇ ਖੇਡਾਂ ਸਬੰਧੀ ਝਗੜਿਆਂ ਤੇ ਖਿਡਾਰੀਆਂ ਦੀਆਂ ਸ਼ਿਕਾਇਤਾਂ ਦੇ ਨਿਬੇੜੇ ਕੀਤੇ ਜਾਂਦੇ ਹਨ।